កម្សាន្ត៖ តារាចម្រៀងស្រី Ariana Grande បានប្រកាសនៅថ្ងៃទី១៧ ខែមករានេះថា​ នាងគ្រោងនឹងចេញអាល់ប៊៊ុមចម្រៀងថ្មីមួយនៅថ្ងៃទី៨ ខែមីនានេះ ដោយអាល់ប៊ុមនោះមានឈ្មោះថា Eternal Sunshine។ កាលពីថ្ងៃសុក្រសប្តាហ៍មុន Grande ក៏បានចេញបទចម្រៀងមួយបទផងដែរ ដែលជាបទថ្មីក្នុងអាល់ប៊ុមរបស់នាងមានចំណងជើងថា Yes, and?

រឿងរ៉ាវនៃអាល់ប៊ុមចម្រៀងរបស់តារាចម្រៀង Ariana Grande បានផ្ទុះឡើងកាលពីថ្ងៃទី២៧ ខែធ្នូ ដោយបានញ៉ោះអ្នកគាំទ្ររបស់នាងនៅលើបណ្ដាញសង្គម Instagram ផ្ទាល់ខ្លួន។ នេះគឺជា Album ចម្រៀងទី ៧ ហើយរបស់នាង និងជាអាល់ប៊ុមដំបូងបង្អស់រាប់ចាប់ពីឆ្នាំ២០២០។ នាងបានបង្ហោះរូបមួយសន្លឹកនៅក្នុងស្ទូឌីយូចម្រៀង រួមជាមួយ Caption ថា​ "ជួបគ្នាឆ្នាំក្រោយ" (See you next year) ដោយបង្ហើបថានេះគឺជាថ្ងៃបង្ហើយសម្រាប់អាល់ប៊ុម ជាមួយនឹងសារលេងសើចយ៉ាងរីករាយផ្ញើទៅកាន់អ្នកគាំទ្រ។ 

មិនត្រឹមតែប៉ុណ្ណោះ នាងក៏ធ្លាប់បង្ហើបទៅកាន់អ្នកគាំទ្រដែលទទួលការកុម្ម៉ង់នូវក្រេមលាបមាត់ R.E.M. ជាមួយក្រដាសមួយសន្លឹកដែលសរសេរពាក្យថា See you next year ដូចគ្នា។ ការប្រកាសអំពីការមកដល់នៃអាល់ប៊ុមនេះធ្វើឡើងចំពេលដែលកំពុងលេចឮព័ត៌៌មានអំពីការចែកផ្លូវគ្នារបស់ Ariana Grande ជាមួយអ្នកគ្រប់គ្រងចាស់វស្សារបស់នាងគឺលោក Scooter Braun និងងាកទៅចុះហត្ថលេខាជាមួយក្រុមហ៊ុន Good World Management វិញ៕